Ginulat ng comedian-TV host na si Vice Ganda kamakailan lamang ang kaniyang mga tagahanga at followers matapos ang kaniyang rebelasyon na nagpakasal na sila ng kaniyang boyfriend na si Ion Perez.

Sa kaniyang YouTube vlog na ibinahagi kahapon, February 13, ibinahagi ni Vice na naganap ang kanilang kasal sa Las Vegas noong nakaraang taon.

Base sa vlog ni Vice, sila ni Ion ay ikinasal sa The Little Vegas noon pang October 19, 2021 kung saan sila ay nagpalitan ng kanilang wedding vows gamit ang wikang Pilipino.

Tinwag din nila ang isa’t isa sa kanilang mga palayaw sa kanilang wedding vows: ang “Noy” para kay Ion” at “Tuy” naman para kay Vice.

Parte ng wedding vow ni Ion kay Vice,

“Buung-buo ang loob ko na makasama ka. Mahal na mahal kita, Tuy.”

Sagot ni Vice, “Noy, mahal na mahal din kita. Ang saya-saya ko na ikaw ang kasama ko ngayon at kahapon. At makakasama ko pa rin bukas at sa susunod pang araw. I promise na mag-iipon pa ako ng maraming maraming pagmamahal sa puso ko.”

Sa nasabing vlog ay makikita din ang pagsuot ng dalawa sa isa’t isa ng singsing at sila din ay nagpirmahan ng kanilang Certificate of Commitment.

Noong sabihin na ng presider na sila ay maaari ng mag-kiss, naghawak lamang ng kamay sina Ion at Vice at saka nagyakapan. Pagkatapos ay hinalikan ni Ion si Vice sa noo ng tatlong beses.

Ilang araw matapos ang kasal nina Ion at Vice ay ipinagdiwang naman ng dalawa ang kanilang ikatlong anibersaryo bilang magkasintahan noong October 25.

Sa dulong parte ng vlog ay mayroong nakalagay na “To infini-THREE and beyond.”

Matatandaan na noong October 2019 ay unang inihayag ni Vice ang kanilang relasyon ni Ion sa “Magpasikat” performance ng TV host sa It’s Showtime.

Ngunit bago ito ay sunod sunod na din ang palitan ng dalawa ng “I love yous” sa naturang programa.